ஷாட், ஷாட் கம்போஸ்ஷிசன், போகஸ்

சினிமாவில் இயக்குநராக வரவிரும்புகிறவர்கள் அனைவருமே, திரைமொழி (film language) பற்றி தெரிந்து வைத்திருக்க வேண்டும். அதாவது. கேமரா பேசும் மொழியை நீங்கள் புரிந்துகொண்டிருப்பது அவசியம். முதலில் நீங்கள் ஷாட்களின் வகைகளையும். கேமரா இயக்கத்தின் உணர்வுகளையும் தெரிந்துகொண்டால்தான், காட்சியியல் ரீதியாகக் கதைசொல்கிற உலகத்திற்குள் அடியெடுத்து வைக்கமுடியும். உங்களுக்கு கேமரா ஷாட் வகைகள், லென்ஸ் தேர்வுகள், கேமரா நகர்வுகள், அது திரையில்/ சட்டகத்தில் (Frame) தோற்றுவிக்கிற உணர்வுகள் என எல்லாவற்றைக் குறித்தும் புரிதல் இருக்க வேண்டும். ஒரு திரைப்படத்தை அணுகுவதில், அதுவே உங்களை இயக்குநராக, சாதாரணப் பார்வையாளர்களிடமிருந்து தனித்துவப்படுத்துகிறது. சினிமா காட்சியியல் மொழி என்கிறோம். இன்னும் தீவிர சினிமா குறித்துப் பேசுகிறவர்கள், "திரைமொழி மட்டும் சாத்தியப்பட்டால், கதைகளை இன்னும் சிறப்பாக மக்களிடம் கொண்டுசேர்க்க முடியும்”, என்பார்கள். அப்படியெனில், இவர்கள் சொல்கிற காட்சியியல் மொழி, திரைமொழி என்றால் என்ன? ஒரு திரைப்படத்தைக் காட்சிகளின் தொகுப்பு என வைத்துக்கொண்டால், அதில் ஒரு காட்சியானது, பல ஷாட்களின் தொகுப்பு. காட்சிக்குத் தகுந்த ஷாட்டினைத் தேர்ந்தெடுத்துவிட்டால், உங்களுக்கும் திரைமொழி வசப்பட்டுவிடும். இப்புத்தகத்தில், திரைமொழி சார்ந்து (film language) உங்களுக்குத் தெரிந்திருக்க வேண்டிய ஷாட் வகைகளைப் பற்றியும். அவை சினிமாக்களில் எப்படிப் பயன்படுத்தப்பட்டிருக்கின்றன? என்பதைக் குறித்தும் உதாரணங்களோடு பார்க்கப்போகிறோம். கேமரா ஷாட் வகைகளைப் பற்றிய அடிப்படையான தெளிவு உங்களுக்கு இருக்கிறபோது, திரை/காட்சிமொழியின் புரிதலும் மேம்படுகிறது. அவற்றை நீங்கள் கதைசொல்லலுக்குப் பயன்படுத்தி, பார்வையாளர்களை வசீகரிக்க முடிகிறது.